Note : Cette page contient la transcription des sous-titres en Inuktitut. Consultez cette page pour la transcription en français.
Transcription
[ ᐅᖃᓪᓚᒃᑎ: ]
ᐅᑉᓗᒥᐅᖓᔪᖅ ᐅᒥᐊᕐᔪᐊᖅ ᐅᓯᖃᑦᑕᖅᑐᒥᑦ, ᐅᓯᔪᖅ ᕚᓐᑰᕙᓕᐊᖅᑐᖅ... ᑯᕌᑉᓄᑦ ᐅᕝᕙᓘᓐᓃᑦ ᓛᑉᔅᑕᓄᑦ ᐃᖃᓗᒃᓯᐅᖅᑎᓄᑦ, ᐱᑕᕈᑎᒋᖃᑦᑕᖅᑕᖏᑦ ᐊᑦᓛᓐᑎᒃ ᐃᒪᑉᑎᖕᓂᑦ... ᐃᖃᓪᓕᐊᖅᑎᓄᑦ, ᐊᒡᔭᖅᑐᐃᔪᑦ ᐱᑕᖅᑕᖏᓐᓂᒃ ᑰᔾᔪᐊᕌᐱᖕᒥᑦ ᓄᓇᓕᖓᑦ ᑕᐃᒪᓐᓇᐃᑉᐸᒃᓯᒪᓂᖏᑦᑎᑐᑦ ᑕᐅᓯᓐᖏᓐᓂᑦ ᐅᑭᐅᓄᑦ... ᐱᓕᕆᖃᑎᒌᖕᓂᕗᑦ ᑲᓇᑕᐅᑉ ᑕᕆᐅᖓᓂᑦ, ᑕᓯᖏᓐᓂᑦ, ᐊᒻᒪᓗ ᑰᖏᓐᓂᑦ, ᐱᒻᒪᕆᐅᔪᖅ.
ᐊᐅᓚᑕᐅᓂᖏᑦ ᐃᓄᐃᑦ ᐊᒻᒪᓗ ᐱᖁᑏᑦ ᐃᒪᕐᒧᑦ ᐱᒋᐊᖅᑎᑦᑎᓯᒪᔪᖅ ᐱᕈᖅᐸᓪᓕᐊᓂᖃᕐᓂᑉᑎᖕᓄᑦ ᐊᒻᒪᓗ ᑕᑯᑎᓯᒪᔮᑎᒍᑦ ᐱᒻᒪᕆᐅᓂᖓᑕ ᐃᒃᐱᒍᓱᒡᕕᖃᕐᓗᓂ ᐊᒻᒪᓗ ᒥᐊᓂᕆᓗᒍ ᓄᓇᕗᑦ ᐊᕙᑎᕗᑦ.
ᐅᒥᐊᕐᔪᐊᑉ ᐃᖏᕐᕋᔭᖕᓂᖓ
ᑐᑭᓯᐊᓗᒍ ᑲᓇᑕᐅᑉ ᐃᒫᓂᑦ ᐊᑦᑕᕐᓇᖅᑐᖃᙱᑎᑦᑎᓂᖓᑦ ᐊᒻᒪᓗ ᒥᐊᓂᖅᓯᓂᕐᒧᑦ ᐋᖅᕿᐅᒪᔪᖏᑦ
ᐅᑭᐅᖅᑕᖅᑐᖅ
ᐱᔭᒃᓴᐅᑎᖓ ᑲᓇᑕᐅᑉ ᑕᕆᐅᕐᒧᑦ ᐊᒻᒪᓗ ᐃᒪᕐᓄᑦ ᑲᓇᑕᒥᑦ ᐃᖏᕐᕋᔭᒃᑐᓕᕆᔨᒃᑯᑦ ᐱᒻᒪᕆᐅᓂᖅᐹᕆᔭᖓ ᐱᓕᕆᐊᖏᓐᓂᑦ.
ᑕᐅᑐᒐᕆᔭᕗᑦ ᐱᑕᖃᖅᑕᐃᓕᑎᓪᓗᒍ, ᐸᕐᓇᒡᓗᒍ, ᐊᒻᒪᓗ ᐅᐸᓗᐊᓗᓂ ᖃᑉᓯᐊᕐᔪᐃᑦ ᐱᓕᕆᖃᑎᑉᑎᖕᓄᑦ, ᐃᓚᐅᑉᓗᑎᒃ ᓄᓇᖃᖅᖄᖅᑐᑦ ᓄᓇᓖᑦ ᐊᒻᒪᓗ ᑲᓇᑕᒥᑦ ᐃᒪᕐᓂᑦ ᒥᐊᓂᖅᓯᔨᒃᑯᑦ.
ᓴᕆᒪᒋᔭᕗᑦ ᐱᓕᕆᐊᕆᖃᑦᑕᖅᑕᕗᑦ ᐊᒻᒪᓗ ᐱᐊᓂᑦᑎᐊᖅᓯᒪᓂᕆᔭᕗᑦ.
ᓄᓇᕐᔪᐊᕐᒥᑦ ᐃᒫᓂᑦ ᐊᑦᑕᕐᓇᖅᑐᖃᙱᑎᑦᑎᓂᕐᒧᑦ ᒪᓕᒐᕋᓛᑦ
ᑲᓇᑕ ᐊᑎᓕᐅᖅᓯᒪᔪᖅ ᐊᒥᓱᓄᑦ ᓄᓇᕐᔪᐊᕐᒥᑦ ᑲᑎᒪᓂᕐᓂᑦ ᐊᒻᒪᓗ ᐊᖏᖃᑎᒌᒍᑎᓄᑦ ᐊᐅᓚᑦᑎᔪᑦ ᖃᓄᖅ ᐅᒥᐊᕐᔪᐊᑦ ᐊᐅᓚᑕᐅᖃᑦᑕᕐᓂᖏᑦ ᓄᓇᕐᔪᐊᕐᒥᑦ.
ᓄᓇᕐᔪᐊᕐᒥᑦ ᒪᓕᒐᐃᑦ ᐋᖅᕿᒃᓯᓯᒪᑎᓪᓗᒋᑦ ᐊᖏᔪᒥᒃ ᓄᓇᕐᔪᐊᕐᒧᑦ ᐋᖅᕿᐅᒪᔪᒥᒃ, ᑲᓇᑕ ᖃᐅᔨᓴᐃᑦᑎᐊᖃᑦᑕᖅᑐᖅ ᐅᒥᐊᕐᔪᐊᓗᒃᑖᓂᒃ ᓇᒧᙵᐅᔪᓄᑦ - ᐅᕝᕙᓘᓐᓃᑦ ᐊᐅᓪᓚᖅᑎᖅᑐᓂᑦ - ᐃᒪᑉᑎᖕᓂᑦ.
ᑲᓇᑕᐅᑉ ᐃᒫᓂᑦ ᐊᑦᑕᕐᓇᖅᑐᖃᙱᑎᑦᑎᓂᕐᓄᑦ ᒪᓕᒐᕋᓛᑦ ᐊᒻᒪᓗ ᒪᓕᒐᐃᑦ
- ᑲᓇᑕᒥᑦ ᐅᒥᐊᕐᔪᐊᓄᑦ ᐱᖁᔭᖅ 2001
- ᐊᒡᔭᖅᑐᖅᑕᐅᓂᖏᑦ ᐅᓗᕆᐊᓇᖅᑐᖃᖅᑐᑦ ᐱᖁᑎᓄᑦ ᐱᖁᔭᖅ
- ᑐᓗᖅᑐᖃᖅᐸᑦ ᒪᓕᒐᕋᓛᑦ
- ᐅᑭᐅᖅᑕᖅᑐᒥᑦ ᐃᒫᓂᑦ ᐱᐅᖏᑦᑐᖅᑕᖃᖅᑕᐃᓕᑎᑦᑎᓂᕐᒧᑦ ᐱᖁᔭᖅ
- ᐅᑭᐅᖅᑕᖅᑐᒥᑦ ᐅᒥᐊᕐᔪᐊᓂᑦ ᐊᑦᑕᕐᓇᖅᑐᖃᙱᑎᑦᑎᓂᕐᒧᑦ ᐊᒻᒪᓗ ᐱᐅᖏᑦᑐᖅᑕᖃᖅᑕᐃᓕᑎᑦᑎᓂᕐᒧᑦ ᒪᓕᒐᕋᓛᑦ
- ᐃᒫᓂᑦ ᐱᔭᒃᓴᖃᖅᑎᑦᑎᓂᕐᒧᑦ ᐱᖁᔭᖅ
- ᐃᒫᒍᑦ ᐊᒡᔭᖅᑐᖅᑕᐅᔪᑦ ᒥᐊᓂᕆᔭᐅᓂᖏᓐᓄᑦ ᐱᖁᔭᖅ
ᐅᒥᐊᕐᔪᐊᑦ ᑲᓇᑕᐅᑉ ᐃᒪᖏᓐᓄᐊᕌᖓᑕ, ᑲᓇᑕᐅᑉ ᒪᓕᒐᖏᑦ ᐊᒻᒪᓗ ᒪᓕᒐᕋᓛᖏᑦ ᐋᖅᕿᒃᓯᖃᑦᑕᖅᑐᑦ ᒪᓕᒃᑕᐅᔭᕆᐊᓕᖕᓂᑦ ᐊᑦᑕᕐᓇᖅᑐᖃᙱᑎᑦᑎᓂᕐᒥᒃ ᐅᒥᐊᕐᔪᐊᓗᒃᑖᓄᑦ 16-ᖑᔪᓂᑦ ᐃᓂᓕᐅᖅᓯᒪᔪᓂᑦ ᐅᒥᐊᕐᔪᐊᓂᒃ ᐊᐅᓚᑦᑎᓂᕐᒧᑦ ᑭᒡᓕᓕᐅᖅᓯᒪᔪᓂᑦ, ᐃᓚᐅᑉᓗᑎᒃ ᑲᓇᑕᒥᑦ ᐅᒥᐊᕐᔪᐊᓕᕆᓂᕐᒧᑦ ᐱᖁᔭᖅ 2001, ᐅᑭᐅᖅᑕᖅᑐᒥᑦ ᐃᒪᖏᓐᓂᑦ ᐱᐅᖏᑦᑐᖅᑕᖃᓕᖅᑕᐃᓕᑎᑦᑎᓂᕐᒧᑦ ᐱᖁᔭᖅ ᐊᒻᒪᓗ ᐅᑭᐅᖅᑕᖅᑐᒥᑦ ᐅᒥᐊᕐᔪᐊᑦ ᐊᑦᑕᕐᓇᖅᑐᖃᙱᑎᑦᑎᓂᕐᒧᑦ ᐊᒻᒪᓗ ᐱᐅᖏᑦᑐᖅᑕᖃᖅᑕᐃᓕᑎᑦᑎᓂᕐᒧᑦ ᒪᓕᒐᕋᓛᑦ.
ᐅᑭᐅᖅᑕᖅᑐᒥᑦ ᓇᓗᓇᐃᒃᑯᑕᖅ
ᐃᓚᒋᔭᐅᑉᓗᑎᒃ ᑲᓇᑕᒥᑦ ᒪᓕᒐᕋᓛᓄᑦ ᐊᒻᒪᓗ ᐱᖁᔭᕐᓄᑦ, ᓄᓇᕐᔪᐊᕐᒥᑦ ᐅᑭᐅᖅᑕᖅᑐᒥᑦ ᓇᓗᓇᐃᒃᑯᑕᖅ ᑐᓂᓯᖃᑦᑕᖅᑐᖅ ᐱᔭᕆᐊᖃᖅᑐᒥᒃ ᐋᖅᕿᐅᒪᔪᒥᒃ ᐅᒥᐊᕐᔪᐊᓗᒃᑖᓄᑦ ᐊᐅᓛᖅᑐᑦ ᐅᑭᐅᖅᑕᖅᑐᒥᑦ.
ᐅᑭᐅᖅᑕᖅᑐᒥᑦ ᓇᓗᓇᐃᒃᑯᑕᖅ ᐊᒻᒪᓗ ᑲᓇᑕᐅᑉ ᒪᓕᒐᓕᕆᓂᕐᒧᑦ ᐋᖅᕿᐅᒪᔪᖏᑦ ᐊᑕᐅᑦᑎᒃᑯᑦ ᐱᓕᕆᖃᑦᑕᖅᑐᑦ ᐊᑦᑕᕐᓇᖅᑐᖃᙱᑦᑐᒃᑯᑦ ᐃᖏᕐᕋᔭᖕᓂᕐᒧᑦ ᐊᒻᒪᓗ ᐊᕙᑎᒥᒃ ᒥᐊᓂᖅᓯᓂᕐᒧᑦ ᐅᑭᐅᖅᑕᖅᑐᒥᑦ ᒥᒃᖠᒋᐊᖅᖢᒋᑦ ᐅᓗᕆᐊᓇᖅᑐᐃᑦ ᐱᓂᕐᓗᐊᕿᓂᒃᑯᑦ ᑯᕕᔪᑦ ᐊᒻᒪᓗ ᐅᒥᐊᕐᔪᐊᑦ ᐃᖏᕐᕋᔭᖕᓂᐊᕐᓗᑎᒃ ᐅᓗᕆᐊᓇᙱᑦᑐᒃᑯᑦ ᐊᔪᕈᖕᓃᖅᓴᖅᓯᒪᔪᓂᒃ ᐅᒥᐊᕐᔪᐊᒦᑦᑐᓂᒃ ᐱᓕᕆᔨᖃᕐᓗᑎᒃ.
ᑕᑯᓚᕗᑦ ᐅᒥᐊᕐᔪᐊᑦ ᐃᖏᕐᕋᔭᒃᑐᑦ ᑲᓇᑕᐅᑉ ᐅᑭᐅᖅᑕᖅᑐᖓᓂᑦ.
[ ᔭᐃᑏᑉ ᔪᕼᐊᕐ (Jaideep Johar)
ᖃᓄᖅᑑᕆᓂᕐᒧᑦ ᐱᓕᕆᐊᓂᒃ ᐱᓕᕆᔨ
ᑲᓇᑕᒥᑦ ᐃᖏᕐᕋᔪᓕᕆᔨᒃᑯᑦ ]
ᕼᐊᓘ, ᔭᐃᑏᑉ ᔪᕼᐊᖑᔪᖓ, ᐊᐅᓚᑦᑎᔨ ᑲᓇᑕᒥᑦ ᐃᖏᕐᕋᔭᒃᑐᓕᕆᔨᒃᑯᑦ ᐃᒫᓂᑦ ᐊᑦᑕᕐᓇᖅᑐᖃᙱᑎᑦᑎᓂᕐᒧᑦ ᐊᒻᒪᓗ ᒥᐊᓂᖅᓯᓂᕐᒧᑦ ᐳᕆᐅᕆᓂᑦ ᐊᒻᒪᓗ ᐅᐊᖕᓇᖅᐸᓯᖕᓂᑦ.
ᐃᓅᓯᕋᓂᑦ ᐃᒫᓂᑦ ᐊᑦᑕᕐᓇᖅᑐᖃᙱᑎᑦᑎᓂᕐᒧᑦ ᐱᓕᕆᓯᒪᔪᖓ ᐊᒻᒪᓗ ᑲᒪᔭᖃᖅᑐᖓ ᒥᐊᓂᖅᓯᓂᕐᒧᑦ ᐱᑦᑕᐅᑦᑎᐊᖅᑐᖅ ᐊᕙᑎᒥᑦ.
ᐅᑭᐅᖅᑕᖅᑐᒥᑦ ᐃᒪᖅᐳᑦ ᑎᑭᑕᐅᖃᑦᑕᖅᑐᑦ ᐅᒥᐊᕐᔪᐊᓂᒃ ᓇᑭᓗᒃᑖᖅ ᓄᓇᕐᔪᐊᕐᒥᙶᖅᑐᓂᑦ.
ᒪᓕᒡᓚᕗᑦ ᐃᖏᕐᕋᔭᒃᑐᑦ ᑎᑭᓴᖅᑐᖅᑐᑦ ᐅᒥᐊᕐᔪᐊᑦ ᐅᓯᖃᖅᖢᑎᒃ.
ᑎᑭᑦᑐᓄᑦ 96 ᐃᑲᕐᕋᓂᑦ ᐅᓂᑉᑳᖅ
ᓯᑕᒪᐃᑦ ᐅᑉᓗᐃᑦ, ᐅᕝᕙᓘᓐᓃᑦ 1,500 ᐃᒪᒃᑯᑦ ᒪᐃᓖᑦ ᖃᓂᑕᖓᓂᑦ ᓯᓚᑖᓂᑦ ᑲᓇᑕᐅᑉ ᐃᒪᖏᓐᓂᑦ, ᐅᒥᐊᕐᔪᐊᓗᒃᑖᑦ ᑎᑭᓴᖅᑐᖅᑐᑦ ᑲᓇᑕᒧᑦ ᖃᐅᔨᑎᑦᑎᖅᖃᐅᑕᐅᖃᑦᑕᖅᑐᑦ ᑲᓇᑕᒥᑦ ᐃᖏᕐᕋᔭᒃᑐᓕᕆᔨᒃᑯᓐᓂᑦ ᐃᒫᓂᑦ ᒥᐊᓂᖅᓯᓂᕐᒧᑦ ᐊᐅᓛᖅᑎᑦᑎᕝᕕᑉᑎᖕᓂᑦ ᑎᑭᓐᓂᐊᓵᖅᑎᓪᓗᒋᑦ ᐅᒥᐊᕐᔪᐊᑉ ᒥᒃᓵᓄᑦ ᑐᑭᓯᐅᒪᔾᔪᑎᓂᒃ ᐱᓂᐊᕐᓗᑎᒃ - ᐅᕐᓂᒃᑕᖓᓐᓂᑦ, ᐅᖁᒪᐃᑎᒋᓂᖓᓂᒃ, ᐅᓯᔭᖏᓐᓂᒃ, ᐱᓕᕆᔨᖏᓐᓂᒃ, ᐊᒻᒪᓗᒃᑲᓐᓃᑦ.
ᒥᐊᓂᖅᓯᓂᖅᓯᓂᕐᒧᑦ ᐅᓗᕆᐊᓇᕐᓂᐅᔪᓂᒃ ᖃᐅᔨᓴᐃᓂᖅ
ᑖᒻᓇ ᑐᑭᓯᐅᒪᔾᔪᑎ ᑐᓂᔭᐅᖃᑦᑕᖅᑐᖅ ᐅᓇᑕᖅᑐᒃᓴᓕᕆᔨᒃᑯᓐᓄᑦ, ᐳᑭᖅᑕᓕᖕᓄᑦ, ᐊᒻᒪᓗ ᑲᓇᑕᒥᑦ ᑭᒡᓕᒋᔭᐅᔪᒥᑦ ᐱᔨᑦᑎᕋᐃᔨᒃᑯᓐᓄᑦ ᐃᓚᒋᔭᐅᑉᓗᓂ ᐊᖏᔫᔪᒥᒃ ᒥᐊᓂᖅᓯᓂᕐᒧᑦ ᐅᓗᕆᐊᓇᖅᑐᓂᒃ ᖃᐅᔨᓴᐃᓂᕐᒧᑦ.
ᐅᒥᐊᕐᔪᐊᑦ ᐊᓯᐊᙳᖅᓯᔭᕆᐊᖃᖃᑦᑕᕐᒥᔪᑦ ᐱᓕᕆᐊᕆᓗᒍᓘᓐᓃᑦ ᐅᒥᐊᕐᔪᐊᕐᒦᑦᑐᖅ ᐃᒪᖓᓐᓂᑦ.
ᑕᐃᒪᓐᓇ ᑕᒫᓂᕐᒥᐅᑕᐅᖏᑦᑐᓂᒃ ᐆᒪᔪᕋᓛᓂᒃ ᐅᒥᐊᕐᔪᐊᕐᒥᙶᖅᑐᒥᒃ ᑲᓇᑕᐅᑉ ᐃᒪᖓᓐᓄᐊᖅᑕᐃᓕᑎᑦᑎᖃᑦᑕᖅᑐᖅ.
ᑲᓇᑕᐅᑉ ᐃᒪᙱᓐᓄᐊᕐᓂᐊᕐᓗᓂ
ᑲᓇᑕᐅᑉ ᐃᒪᖁᑎᖓᓄᐊᖅᖄᖅᑎᓐᓇᒋᑦ, ᐅᒥᐊᕐᔪᐊᑦ ᖃᐅᔨᑎᑦᑎᖃᑦᑕᖅᑐᑦ ᑲᓇᑕᒥᑦ ᐃᒪᖏᓐᓂᑦ ᒥᐊᓂᖅᓯᔨᒃᑯᓐᓄᑦ ᐃᖃᓗᖕᓂᑦ.
ᐃᓚᒋᔭᐅᑉᓗᓂ ᐅᓂᑉᑳᒧᑦ, ᐅᒥᐊᕐᔪᐊᑉ ᐊᖓᔪᖅᖄᖓ ᑐᓂᓯᔭᕆᐊᖃᖃᑦᑕᖅᑐᖅ ᐃᖏᕐᕋᖕᓂᐊᕐᓂᖓᓄᑦ ᐸᕐᓇᐅᑎᒥᑦ ᐊᒻᒪᓗ ᖃᐅᔨᑎᑦᑎᓗᑎᒃ ᓱᓇᑐᐃᓐᓇᓂᒃ ᐃᑯᒪᓂᒃ ᐊᔪᓕᖅᓯᒪᔪᓂᒃ ᐅᕝᕙᓘᓐᓃᑦ ᐊᐅᓛᖅᑎᑦᑎᓂᕐᒧᑦ ᐱᔭᕆᐊᖃᖅᑐᓂᒃ ᐱᑕᖃᖅᐸᑕ.
ᐅᒥᐊᕐᔪᐊᓗᒃᑖᑦ ᐊᐅᓛᖅᑎᑦᑎᔪᑦ ᑲᓇᑕᐅᑉ ᐃᒪᖏᓐᓂᑦ, ᐊᑐᕆᐊᖃᖃᑦᑕᖅᑐᑦ ᐊᔾᔨᐅᖏᑦᑐᒥᒃ ᐅᖅᓱᕐᒥᑦ ᒥᒃᖠᒋᐊᖅᑎᓐᓂᐊᕐᓗᒋᑦ ᐱᐅᖏᑦᑐᑦ ᐊᓂᐊᔪᑦ, ᐱᐅᓯᒋᐊᖅᓯᔪᖅ ᑭᑐᓗᒃᑖᓄᑦ ᐊᓂᖅᓵᖅᑐᖅᑕᐅᔪᒥᑦ.
ᑲᓇᑕᒥᑦ ᖃᖓᑕᓲᒃᑯᑦ ᖃᐅᔨᓴᐃᓂᕐᒧᑦ ᑐᕌᖓᔪᖅ
ᑲᓇᑕᒥᑦ ᐃᖏᕐᕋᔭᒃᑐᓕᕆᔨᒃᑯᑦ ᖃᖓᑕᓲᒃᑯᑦ ᖃᐅᔨᓴᐃᓂᕐᒧᑦ ᑐᕌᖓᔪᖓᑦ ᐱᒻᒪᕆᐅᔪᖅ ᐃᓚᒋᔭᐅᑉᓗᓂᑲᓇᑕᐅᑉ ᒥᐊᓂᖅᓯᓂᖓᓄᑦ ᐃᒪᐅᑉ ᐊᕙᑎᖓᓂᑦ ᐊᒻᒪᓗ ᐆᒪᔪᖏᓐᓂᑦ ᐃᒫᓂᑦ, ᐊᑕᐅᑦᑎᒃᑯᑦ ᐅᓗᕆᐊᓇᙱᓐᓂᖅᓴᐅᑎᓐᓂᐊᕐᓗᒋᑦ ᐅᒥᐊᕐᔪᐊᓕᕆᔩᑦ.
ᐅᒥᐊᕐᔪᐊᑦ ᐃᖏᕐᕋᔭᒃᑎᓪᓗᒋᑦ ᐅᑭᐅᖅᑕᖅᑐᒥᑦ ᐃᒪᖏᓐᓂᑦ, NASP ᑎᖕᒥᓲᖅ ᖃᐅᔨᓴᐃᖃᑦᑕᖅᑐᖅ ᐅᒥᐊᕐᔪᐊᑦ ᐃᖏᕐᕋᔭᒃᑐᓂᒃ, ᖃᐅᔨᓂᐊᕐᓗᑎᒃ ᐅᖅᓱᐊᓗᖕᒥᑦ ᑯᕕᔪᓂᒃ ᐊᓯᖏᓐᓄᓪᓗ ᐃᒪᕐᒥᑦ ᐱᐅᖏᓕᖅᑎᑦᑎᔪᓂᒃ.
ᐅᒥᐊᕐᔪᐊᑦ ᖃᐅᔨᒪᖕᒪᑕ ᑕᑯᔭᐅᖃᑦᑕᕈᖕᓇᕐᒪᑕ ᖃᖓᒃᑯᑐᐃᓐᓇᖅ, NASP ᓴᙱᔪᒻᒪᕆᐅᔪᖅ ᐅᒥᐊᕐᔪᐊᓂᒃ ᐅᖅᓱᐊᓗᖕᒥᑦ ᑯᕕᑎᑦᑎᙱᓐᓂᕐᒧᑦ.
ᑯᕕᔪᖃᖅᐸᑦ ᐅᐸᓗᐊᓂᖅ
ᑲᓇᑕᐅᑉ ᐅᑭᐅᖅᑕᕐᒥᑦ ᐃᒪᖏᓐᓂᑦ, ᐊᔪᖅᑎᑦᑎᔪᑦ ᐱᑦᑕᐅᖏᑦᑐᓂᒃ ᐅᕝᕙᓘᓐᓃᑦ ᐅᖅᓱᐊᓗᖕᒥᑦ ᑯᕕᑎᑦᑎᓂᕐᒥᒃ ᐅᒥᐊᕐᔪᐊᕐᓂᙶᖅᑐᓂᒃ, ᑭᓯᐊᓂ ᐊᔾᔨᐅᖏᑦᑐᒥᒃ ᖃᓄᐃᖓᓂᐅᒃᐸᑦ ᐊᐅᓚᑕᐅᓂᖃᑦᑎᐊᖅᖢᑎᒃ.
ᑯᕕᔪᖃᖅᐸᑦ, “ᐱᐅᖏᑦᑐᖃᓕᖅᑎᑦᑎᔪᖅ ᐊᑭᓖᖃᑦᑕᖅᑐᖅ” ᐋᖅᕿᐅᒪᔪᖃᖅᑐᖅ ᐅᒥᐊᕐᔪᐊᑦ ᑎᑭᓴᖅᑐᖅᑐᑦ ᐅᑭᐅᖅᑕᖅᑐᒧᑦ ᐱᔭᒃᓴᐅᑎᖃᖃᑕᐅᓂᐊᕐᓗᑎᒃ ᐅᖅᓱᐊᓗᖕᒥᑦ ᑯᕕᔪᒧᓄᑦ ᑲᓇᑕᐅᑉ ᐃᒪᖏᓐᓄᑦ.
ᐃᒪᕐᒥᑦ ᒥᐊᓂᖅᓯᔨᒃᑯᑦ ᖃᐅᔨᓴᐃᓂᕐᒧᑦ ᐋᖅᕿᐅᒪᔪᑦ
ᖃᖓᑕᓲᓂᒃ ᐊᐅᓚᑦᑎᔾᔪᑎᑐᑦ, ᐊᑐᓂ ᐅᒥᐊᕐᔪᐊᑦ ᐊᖏᑎᒋᓂᐊᖅᑐᓄᑦ ᖃᐅᔨᓴᖅᑕᐅᖃᑦᑕᖅᑐᑦ ᑲᓇᑕᒥᑦ ᐃᒪᖏᓐᓂᑦ ᒥᐊᓂᖅᓯᔨᒃᑯᑦ ᑐᓴᐅᒪᖃᑦᑕᐅᑎᓕᕆᔾᔪᑎᖏᑦᑎᒍᑦ ᐊᒻᒪᓗ ᑲᓇᑕᒥᑦ ᐃᖏᕐᕋᔭᒃᑐᓕᕆᔨᒃᑯᑦ ᖃᓂᑦᑐᒥᑦ ᐱᓕᕆᔨᖓᓄᑦ.
ᑐᑭᓯᐅᒪᔾᔪᑏᑦ ᐅᒥᐊᕐᔪᐊᕐᒥᑦ ᐱᔾᔪᑎᖃᖅᑐᑦ, ᓯᕗᓂᐊᒍᑦ ᐃᒃᓴᕐᕕᖕᒧᑦ ᐅᖃᓗᖕᓂᖏᑦ, ᖃᖓᒃᑰᖓᔪᖓᑦ ᐃᖏᕐᕋᔭᖕᓂᕐᒧᑦ, ᓱᓇᑐᐃᓐᓇᐃᓪᓗ ᐱᔾᔪᑎᖃᖅᑐᑦ ᐅᕝᕙᓘᓐᓃᑦ ᐃᖢᐃᓗᑕᖃᖅᐸᑦ ᐅᒥᐊᕐᔪᐊᖅ ᓄᑖᙳᖅᑎᖅᑕᐅᖏᓐᓇᖃᑦᑕᖅᑐᑦ ᐊᒻᒪᓗ ᐱᒻᒪᕆᐅᔪᖅ ᐅᓗᕆᐊᓇᖅᑐᖃᕐᓂᐊᖏᓪᓗᑎᒃ ᐊᒻᒪᓗ ᒥᐊᓂᕆᔭᐅᓗᑎᒃ ᐅᒥᐊᕐᔪᐊᓗᒃᑖᑦ ᐊᒻᒪᓗ ᐃᒃᓴᕐᕖᑦ ᑲᓇᑕᒥᑦ.
ᐱᖁᑎᖃᖅᑎᑦᑎᓂᖅ ᐅᑭᐅᖅᑕᖅᑐᒥᑦ
90%-ᖏᑦ ᐱᖁᑏᑦ ᐅᑭᐅᖅᑕᖅᑐᒧᙵᐅᔪᑦ ᐅᒥᐊᕐᔪᐊᒃᑯᑦ ᑎᑭᑎᑕᐅᖃᑦᑕᖅᑐᑦ ᐅᒥᐊᕐᔪᐊᒃᑯᑦ ᐊᒻᒪᓗ ᒥᑭᓂᖅᓴᓄᑦ ᓄᓇᓕᖕᒧᐊᖃᑦᑕᖅᑐᑦ ᐊᒡᔭᖅᑐᐃᔪᑦ ᐱᖁᑎᓂᑦ, ᐊᐅᔭᒃᑯᓗᐊᖅ ᐃᒪᒃᑯᑦ ᐃᖏᕐᕋᔭᖕᓇᐅᑎᓪᓗᒍ ᓴᒡᒐᕉᑦᒥᑦ (ᔪᓚᐃ) ᐅᑭᐅᓖᑦᒧᑦ (ᐆᒃᑑᐱᕆ).
ᓯᑯᒥᑦ ᓯᖁᑉᑎᕆᔩᑦ ᐅᒥᐊᕐᔪᐊᑦ ᐱᒻᒪᕆᐅᔪᑦ ᐃᖏᕐᕋᔭᖕᓂᐊᕐᓗᓂ ᐅᑭᐅᖅᑕᖅᑐᒥᑦ ᐊᑉᖁᑎᓕᐅᖃᑦᑕᕐᒪᑕ ᓯᑯᒃᑯᑦ ᑕᕆᐅᒃᑯᑦ.
ᑕᐃᒪᓐᓇ ᐅᓗᕆᐊᓇᙱᑎᑦᑎᓂᖃᖅᑐᖅ ᐊᒻᒪᓗ ᐊᔪᙱᓪᓗᑎᒃ ᐅᒥᐊᕐᔪᐊᓂᑦ ᑕᒫᓂ.
ᑭᓯᐊᓂ, ᓯᑯᓂᒃ ᓯᖁᑉᑎᕆᓲᑦ ᐅᒥᐊᕐᔪᐊᑦ ᐊᔭᐅᖃᑦᑕᖅᑐᑦ ᐃᑉᔪᔪᑦ ᓯᑯᓂᒃ, ᑕᐃᒪᓐᓇ ᐅᓗᕆᐊᓇᖅᑎᑦᑎᓂᖃᖅᑐᖅ ᐅᓗᕆᐊᓇᕐᓂᕐᒦᑦᑐᖕᓇᕐᓂᖏᑦ ᓂᕐᔪᑏᑦ ᐅᕝᕙᓘᓐᓃᑦ ᐃᓄᐃᑦ ᐊᒻᒪᓗ ᒪᖃᐃᑏᑦ ᐊᔪᖅᓯᐅᑉᖃᓕᕈᖕᓇᖅᑐᑦ ᓯᓈᓃᑦᑐᓂᑦ ᓯᑯᓂᑦ.
ᐅᓗᕆᐊᓇᕐᓂᐅᔪᖅ ᒥᒃᖠᒋᐊᕐᓂᐊᕐᓗᒍ, ᐃᓄᐃᑦ ᓄᓇᓕᖕᒥᐅᑕᐃᑦ, ᑲᓇᑕᒥᑦ ᐃᖏᕐᕋᔭᒃᑐᓕᕆᔨᒃᑯᑦ ᐊᒻᒪᓗ ᑲᓇᑕᒥᑦ ᐃᒫᓂᑦ ᒥᐊᓂᖅᓯᔩᑦ ᒫᓐᓇᓵᖑᓚᐅᖅᑐᑦ ᐋᖅᕿᒃᓯᓚᐅᖅᑐᑦ ᓯᕗᓪᓕᖅᐹᒥᑦ ᐅᑭᐅᑉ ᐃᓚᖓᓂᑦ ᖃᐅᔨᒃᑲᐃᔾᔪᑎᒥᑦ ᐃᒪᕐᒥᑦ ᐊᑐᖃᑦᑕᖅᑐᓄᑦ ᕿᑎᕐᒥᐅᓂᑦ.
ᐅᒥᐊᕐᔪᐊᑦ ᑐᓂᓯᖃᑦᑕᕆᐊᖃᖅᑐᑦ ᐱᓇᓱᐊᕈᓯᑕᒫᑦ ᖃᐅᔨᒃᑲᐅᑎᒥᒃ ᐊᑉᖁᓵᕐᕕᒋᓂᐊᖅᑕᖏᓐᓄᑦ ᓄᓇᓕᖕᓄᑦ ᒥᑭᓛᒃᑰᖅᑎᓐᓂᐊᕐᓗᒍ ᐅᓗᕆᐊᓇᕐᓂᐅᔪᑦ ᐃᓄᖕᓄᑦ ᐊᒻᒪᓗ ᐊᑉᖁᓵᖃᑦᑕᖅᑐᑦ ᑐᒃᑐᓄᑦ ᐊᒻᒪᓗ ᓂᕐᔪᑎᓄᑦ ᐃᖏᕐᕋᔭᒃᑐᓄᑦ ᑕᕆᐅᑉ ᓯᑯᖓᒍᑦ.
ᑕᒫᓂ ᐱᓕᕆᐊᑉᑎᖕᓂᑦ ᐃᓚᒋᔭᐅᔪᖅ ᐱᓕᕆᑎᒋᓗᒋᑦ ᐃᓄᐃᑦ ᓄᓇᓕᖕᓂᑦ ᓯᕗᒻᒧᖕᓂᐊᕐᓗᒍ ᐃᒪᒃᑯᑦ ᐊᑦᑕᕐᓇᖅᑐᖃᙱᑎᑦᑎᓂᖅ ᐊᒻᒪᓗ ᒥᐊᓂᕆᓂᐊᕐᓗᒋᑦ ᐊᔾᔨᐅᖏᑦᑐᖅ ᐱᕈᖅᐸᓪᓕᐊᓂᖃᖃᑎᒌᒃᑐᑦ ᐅᑭᐅᖅᑕᖅᑐᒥᑦ.
ᐃᒃᓴᕐᕕᐅᑉ ᖃᓄᐃᖓᓂᖓᓄᑦ ᐊᐅᓚᑦᑎᓂᕐᒧᑦ ᑐᕌᖓᔪᖅ
ᐅᒥᐊᕐᔪᐊᑦ ᐃᒃᓴᕐᕕᖕᓂᑦ ᖃᓄᐃᓐᓂᖏᓐᓄᑦ ᖃᐅᔨᓴᖅᑕᐅᔪᖕᓇᖅᑐᑦ ᑲᓇᑕᒥᑦ ᐃᖏᕐᕋᔭᒃᑐᓕᕆᔨᒃᑯᑦ ᐃᒫᓂᑦ ᐊᑦᑕᕐᓇᖅᑐᖃᙱᑎᑦᑎᓂᕐᒧᑦ ᐱᓕᕆᔨᒧᑦ.
ᓄᓇᕐᔪᐊᕐᒧᑦ ᐱᓂᐊᕐᓂᕗᑦ ᐊᑐᕐᓂᐊᕐᓗᒋᑦ, ᑲᓇᑕᒥᑦ ᐃᖏᕐᕋᔭᒃᑐᓕᕆᔨᒃᑯᑦ ᖃᐅᔨᓴᐃᔨᖏᑦ ᐅᒥᐊᕐᔪᐊᓄᐊᖃᑦᑕᖅᑐᑦ ᖃᐅᔨᓂᐊᕐᓗᑎᒃ ᑎᑭᐅᑎᓯᒪᒐᓗᐊᕐᓂᖏᓐᓄᑦ ᓄᓇᕐᔪᐊᕐᒧᑦ ᐊᒻᒪᓗ ᖃᓂᑦᑐᒧᑦ ᒪᓕᒐᕐᓄᑦ ᐊᒻᒪᓗ ᒪᓕᒐᕋᓛᓄᑦ ᐊᓯᐊᓄᑦ ᑐᕌᖅᑕᖓᓄᙵᐅᒋᐊᕐᓂᐊᓵᖅᑎᓪᓗᒋᑦ.
ᓄᓇᓕᖕᒧᑦ ᐱᖁᑏᑦ ᐅᒥᐊᕐᔪᐊᒃᑯᑦ ᐊᒡᔭᖅᑕᐅᔪᑦ ᐅᓯᖏᔭᐃᕌᓂᒃᑳᖓᑕ, ᐱᖃᑖᓄᑦ ᐅᕐᓂᒃᑕᖓᓐᓄᙵᐅᒋᐊᖃᑦᑕᖅᑐᑦ.
ᐃᒫᓂᑦ ᐊᔪᕈᖕᓃᖅᓴᐃᓂᕐᒧᑦ ᑐᕌᖓᔪᖅ
ᐃᓂᒋᔭᑉᑕ ᐅᖓᑖᓄᑦ ᐃᒫᓂᑦ ᐊᑦᑕᕐᓇᖅᑐᖃᙱᑎᑦᑎᓂᕐᒧᑦ ᐊᒻᒪᓗ ᒥᐊᓂᖅᓯᓂᕐᒧᑦ ᐋᖅᕿᐅᒪᔪᓂᑦ, ᐱᓕᕆᖃᑎᒋᔭᕗᑦ ᓄᓇᖃᖅᖄᖅᑐᑦ ᓄᓇᓖᑦ ᐃᑲᔪᖃᑦᑕᖅᑐᑦ ᓴᙱᒃᑎᑎᓐᓂᐊᕐᓗᒍ ᑲᓇᑕᐅᑉ ᐃᒪᖓᓂᑦ ᐱᕈᖅᐸᓪᓕᐊᓂᖃᕐᓂᖅ ᐊᒻᒪᓗ ᐊᕙᑎᖓ, ᐱᓗᐊᖅᑐᒥᑦ ᐊᔪᙱᓐᓂᖃᖅᑐᓂᒃ ᐱᓕᕆᔨᑖᖅᑐᕐᓃᑦ.
ᓴᖅᕿᑦᑎᓂᖅ ᐱᓕᕆᐊᒃᓴᓂᒃ ᐊᒻᒪᓗ ᐊᖏᒡᓕᒋᐊᒃᑲᓐᓂᕐᓗᒍ ᐃᒫᓂᑦ ᐊᑦᑕᕐᓇᖅᑐᖃᙱᑎᑦᑎᓂᖅ ᓄᓇᖃᖅᖄᖅᑐᑦ ᐊᒻᒪᓗ ᐃᒪᕐᓄᑦ ᖃᓂᑦᑐᑦ ᓄᓇᓖᑦ, ᐋᖅᕿᒃᓯᓚᐅᖅᑐᒍᑦ ᐃᒫᓂᑦ ᐊᔪᕈᖕᓃᖅᓴᐃᓂᕐᒧᑦ ᑐᕌᖓᔪᒥᑦ ᐱᖓᓱᐃᑦ ᐅᑭᐅᖅᑕᖅᑐᒥᑦ ᐊᕕᒃᑐᖅᓯᒪᔪᓂᑦ ᐃᑲᔪᕐᓂᐊᕐᓗᒋᑦ ᑭᒡᒐᖅᑐᖅᑕᐅᓂᖃᙱᓗᐊᖅᑐᑦ, ᓲᕐᓗ ᐊᕐᓇᐃᑦ, ᓄᓇᖃᖅᖄᖅᑐᑦ ᐃᓄᐃᑦ, ᐅᑭᐅᖅᑕᖅᑐᒥᐅᑕᐃᑦ ᐊᒻᒪᓗ ᐃᓄᐃᑦ ᐃᒫᓂᑦ ᐊᔪᕈᖕᓃᖅᓴᖅᑕᐅᔪᖕᓇᕐᓂᐊᕐᓗᑎᒃ ᐊᒻᒪᓗ ᐱᓕᕆᐊᒃᓴᓄᑦ ᐱᕕᖃᕈᖕᓇᕐᓂᐊᕐᓗᑎᒃ ᐃᒫᓂᑦ ᐱᓕᕆᐊᖃᖅᑐᓄᑦ.
[ ᐅᖃᓪᓚᒃᑎᐅᖅᖃᐅᑕᐅᔪᖅ: ]
ᓴᕆᒪᓱᒃᑐᒍᑦ ᐃᒫᓂᑦ ᐊᑦᑕᕐᓇᖅᑐᖃᙱᑎᑦᑎᓂᕐᒧᑦ ᐊᒻᒪᓗ ᒥᐊᓂᖅᓯᓂᕐᒧᑦ ᐋᖅᕿᐅᒪᔪᑦ ᐊᔪᙱᒻᒪᑕ. ᐊᒥᓱᙳᕆᐊᖅᓯᒪᓕᕋᓗᐊᖅᑎᓪᓗᒋᑦ ᐃᒫᓂᑦ ᐃᖏᕐᕋᔭᖃᑦᑕᖅᑐᓄᑦ, ᑯᕕᔪᑦ ᐊᒻᒪᓗ ᖃᓄᐃᓕᓂᐅᔪᑦ ᒥᒃᖠᕚᓪᓕᕐᔪᐊᖅᓯᒪᔪᑦ 20 ᐅᑭᐅᑦ ᐊᓂᒍᖅᑐᓂᑦ, ᐊᒻᒪᓗ ᐱᐅᓯᒋᐊᖅᓯᓂᖃᐃᓐᓇᕐᓂᐊᖅᑐᒍᑦ ᑲᑉᐳᔾᔭᓅᖅᑐᑦ ᐊᓯᐊᙳᖅᐸᓪᓕᐊᑎᓪᓗᒋᑦ ᐊᒻᒪᓗ ᓴᙱᒃᑎᓪᓗᒋᑦ ᐱᓕᕆᖃᑎᒌᖕᓂᕗᑦ ᓄᓇᖃᖅᖄᖅᑐᓂᑦ ᐊᒻᒪᓗ ᐃᒪᕐᒧᑦ ᖃᓂᑦᑐᑦ ᓄᓇᓕᖕᓂᑦ.
- ᑎᑎᕋᕐᓗᒋᑦ ᑕᒪᕐᒥᑦ ᑕᓪᓕᒪᐃᑦ ᐊᑎᕆᔭᐅᔪᑦ:
- ᐅᑭᐅᖅᑕᖅᑐᖅ
- ᐊᑦᓛᓐᑎᒃ (Atlantic)
- ᑕᓯᕐᔪᐊᑦ ᐊᒻᒪᓗ ᐃᒪᖓ/ᓴᐃᓐᑦ ᓛᕆᐊᓐᔅ ᑰᒃ
- ᐸᓯᕕᒃ ᐅᐊᖕᓇᖓᓂᑦ ᐃᒪᖅ
- ᐸᓂᕕᒃ ᓂᒋᐊᓂᑦ ᐃᒪᖅ
ᑖᒻᓇ ᐃᓚᒋᔭᐅᔪᖅ ᑕᓪᓕᒪᐅᔪᓂᑦ ᐊᐅᓚᔪᓕᐊᓂᑦ ᐱᔾᔪᑎᖃᖅᑐᓂᒃ ᑲᓇᑕᐅᑉ ᐃᒪᖏᓐᓂᑦ ᐊᑦᑕᕐᓇᖅᑐᖃᙱᑎᑦᑎᓂᕐᒧᑦ ᐊᒻᒪᓗ ᒥᐊᓂᖅᓯᓂᕐᒧᑦ ᐋᖅᕿᐅᒪᔪᖏᓐᓂᑦ. ᖃᐅᔨᒃᑲᓐᓂᕈᖕᓇᖅᑐᑎᑦ ᐅᕙᓂ www.canada.ca/oceans-protection-plan.
ᑕᕆᐅᕐᒥᒃ ᒥᐊᓂᖅᓯᓂᕐᒧᑦ ᐸᕐᓇᐅᑎ
ᐊᒻᒪᓗ ᑲᓇᑕ